Ven para o blogue e gaña...

Xa temos a primeira participación no concurso. É pola modalidade fas fotos? A foto é de Mar Otero, alumna de 2º de bacharelato. A autora acompañou a foto cun texto que tamén reproducimos. Preme nas imaxes para velas mellor.

"La foto principal que quiero presentar es la de la boca de la chimenea ampliada. La otra no me gusta demasiado porque las casas que salen fastidian un poco la composición, pero me interesaba que se viera el contexto. Esto pasa a menudo en mi barrio y teóricamente entra dentro del límite de contaminación atmosférica que se permite, pero aún así no me parece normal que al tocar las plantas de la calle se te manchen los dedos de negro. Aquí hay gente que tiene tierras de cultivo y comen toda la porquería que absorben su huertos."

Ven para o blogue e gaña... 2ª edición

Xa está en marcha a segunda edición do concurso Ven para o blogue e gaña... Podedes apañar unha copia das bases na Biblioteca ou acceder directamente a elas na páxina que se atopa na parte superior do blogue, Ven para o blogue... Bases.
Como na convocatoria anterior, o concurso desenvolverase en dúas fases e contará con seis modalidades. A primeira fase comeza xa. Enviádenos as vosas obras e as que foren seleccionadas serán publicadas no blogue. Segundo vaian sendo publicadas, recibirán como premio entradas de cine.
Na segunda fase, farase un concurso no que a mellor obra de cada modalidade obterá un novo premio. Nesta segunda fase, haberá un xurado e un dos membros seredes vós, o alumnado. Podedes participar na selección de gañadores a través dos comentarios do blogue, dicindo que traballos vos gustan. Os premios desta segunda fase e a súa entrega comunicarase no momento oportuno.

Cabazas, castañas e refráns

Con motivo do Samaín, realizamos un concurso de cabazas no que participaron, como xa é tradición, os alumnos de 1º da ESO. Tamén fixeron un mural con refráns e adiviñas que tiveron como protagonista a castaña. Disto deixámosvos mostras nas fotos. Do que xa non podemos dar nin a proba é das castañas do magosto co que rematamos a festa. Espero que todos tiverades ocasión de as degustar.
Parabens aos gañadores do concurso!

 
A música que soa é un fragmento de Autumn Leaves, en versión de Eric Clapton.

Cine-fórum: Tempos modernos

Mércores 26, dentro do ciclo Comedia en branco e negro, proxectarase o filme Tempos modernos, dirixida por Charles Chaplin. Como sempre, será ás 16:30 na Biblioteca. Para vos informardes máis polo miúdo, premede no cartaz.

Comentarios no blogue

Esta entrada é para vos lembrar que só publicamos comentarios correctamente identificados, isto é, que leven nome e apelidos (tamén podedes especificar a relación co centro: se sodes alumnos, pais, curso...).
Se queredes poñervos en contacto con nós, tendes os nosos enderezos de correo no menú que se atopa na parte superior do blogue, na páxina "Contacto". Os nosos enderezos son:

• bibliotecasardineira@gmail.com Este é o enderezo para calquera cousa relacionada co funcionamento da biblioteca e para nos facer suxestións para a adquisición de fondos.
• blogbibliosardineira@gmail.com Este é o enderezo para todo o relacionado co blogue. Por exemplo, se queres participar na sección "Compartindo", envíanos as cousas que desexes compartir a este enderezo. Escríbenos para facer as suxestións que cosideres oportunas.

Pero lembra: tanto os comentarios como os correos deben ir correctamente identificados.
Agardamos novas vosas!

Día da Ciencia en Galego: Exposición

A semana pasada iniciamos a celebración do Día da Ciencia en Galego cunha exposición: Ciencia, muller, galego. Adiviña que teñen en común. A exposición estará no vestíbulo do Centro até o 6 de novembro. Esta exposición é parte doutra organizada pola Biblioteca sobre Igualdade de xénero, realizada coa colaboración de: Departamento de Matemáticas, Departamento de Xeografía e Historia, Departamento de Lingua galega e Literatura, Departamento de Lingua castelá e Literatura, Departamento de Inglés e Departamento de Filosofía.
A conmemoración do Día da Ciencia en Galego concluirá coa tradicional mostra dos máis variados e espectaculares experimentos, realizados polo alumnado do Ciclo, que terá lugar o día 7 de novembro.

Cine-fórum: O maquinista da "General"

Mércores 29, dentro do ciclo Comedia en branco e negro, proxectarase o filme O maquinista da "General", dirixida por Buster Keaton. Como sempre, será ás 16:30 na Biblioteca. Para vos informardes máis polo miúdo, premede no cartaz.