Poesía e graffiti con Dores Tembrás

O alumnado de 1º de bacharelato tivo a sorte de compartir a tarde do pasado martes, 9 de abril, con Dores Tembrás nun obradoiro de poesía e graffiti que serviu non só para reflexionar sobre a esencia do poético, senón tamén para interpretar algunhas das suxestivas pintadas seleccionadas pola poetisa: “Solo solos somos libres”. Así valoraron algúns dos nosos alumnos este encontro: “moi reflexivo, moi inspirador”; “conseguiu captar a miña atención”; “múltiples interpretacións”... 

Recitando a Celso Emilio

O 12 de decembro de 1912 nacía en Celanova, Celso Emilio Ferreiro. Celso Emilio foi escritor e político, cultivou a poesía e tamén a narrativa. O seu poema Longa noite de pedra converteuno no máximo expoñente da poesía social na literatura galega. Para conmemorar o centenario do seu nacemento, o 12 de decembro de 2012, ás 12:00 h., milleiros de mozos dos centros educativos de toda Galicia participaron na convocatoria da Coordinadora Galega de Equipos de Normalización e Dinamización Lingüística (CGENDL) nun recital público e simultáneo do poema Deitado frente ao mar, un dos seus poemas máis emblemáticos. Fixémolo no noso instituto con alumnado do 2º ciclo da ESO e de bacharelato. Axudamos, pois, a manter viva a memoria dun dos grandes poetas galegos do século XX.

Celso Emilio Ferreiro: vídeos

Aquí tendes uns vídeos onde se musican poemas de Celso Emilio. Bótadelles unha ollada. Premede na foto para velos.

Centenario de Celso Emilio Ferreiro

Estamos a celebrar na Biblioteca unha exposición co motivo do centenario de Celso Emilio Ferreiro. A exposición está organizada pola Biblioteca coa colaboración do Departamento de Xeografía e Historia e a Vicedirección. A través dos titores farémosvos chegar uns cuestionarios que, como xa sabedes, os que teñan menos de tres fallos entrarán, xunto co resto dos cuestionarios das exposicións do trimestre, no habitual sorteo de entradas de cine. Agardamos a vosa visita.

Día mundial da poesía

Hoxe celebramos o Día mundial da poesía. Temos unha mostra no vestíbulo do instituto de diferentes xogos poéticos. A exposición está baseada nunha unidade didáctica de Elvira Riveiro. Estará ata finais da semana. Colaboraron con nós nesta actividade o Departamento de lingua e literatura galega, o de normalización lingüística e o de plástica. Podedes ver os centóns e caligramas realizados polos alumnos.

Tamén celebramos o día con versos con sorpresa. Pasa pola biblioteca e caramelízate. Hai sorteo e premio. Saberás máis se vés. Agardámoste.